За гэты тыдзень на Аршаншчыне двойчы злачынцы з мэтай крадзяжу зрывалі навясныя замкі. Так, у перыяд з вечара 15 лютага па дзень 16 лютага невядомы сарваў навясны замок з прыватнага дома скраў... пыласос. Пыласос супрацоўнікамі міліцыі быў ацэнены ў мільён рублёў, заведзена крымінальная справа.
У сераду 17 лютага ў міліцыю звярнуўся чыгуначнік, які паведаміў, што з дома на яго лецішчы таксама быў сарваны навясны замок і скрадзены 10-гадовы ровар "Аіст", ТВ-цюнэр, электранасос і харчы. Страты ацэнены ў 4 мільёны. Гэта не адзінае злачынства зробленае на лецішчах - на наступны дзень у міліцыю звярнулася пенсіянерка, паводле яе слоў за месяц пакуль яе не было на лецішчы, невядомы разбіў вакно ў доміку на лецішчы і скраў кансервы на 240.000 рублёў.
Зводкі УУC на гэтым тыдні паведамляюць пра даволі цікавы крадзёж, які адбыўся яшчэ 27 студзеня. У першай палове дня невядомы скраў 41 кубаметар дзелавой драўніны, якая ляжала на збочыне дарогі на суму 21 з паловай мільёны.
