Красавік і травень 2017 года сталіся рэкордна халоднымі для Беларусі. Пра гэта паведаміла начальнік аддзелу клімату Рэспубліканскага цэнтра па гідраметэаралогіі, кантролю радыёактыўнага забруджвання і маніторынгу навакольнага асяроддзя Алена Камароўская. На адмысловай прэс-канферэнцыі ў Менску, дзе прысутнічаў і карэспандэнт orsha.eu, Алена Камароўская распавяла, што вясна сёлета прыйшла на тэрыторыю нашай краіны 18 лютага, што незвычайна і выбіваецца з нормы. І першая палова вясны была цёплай, у сакавіку сярэднямесячная тэмпература нават была вышэй за звыклую на 6 градусаў.

Характэрныя тэмпературы адсутнічалі і ў другой палове вясны. Толькі ўжо ў іншым кірунку, халодным. З сярэдзіны красавіка па сярэдзіну траўня ў нашай краіне назіралася сярэдняя тэмпература на 3 - 3,5 градусы ніжэй за норму. Так халодна ў гэты перыяд не бывала больш за 70 гадоў! 10-12 траўня на большай частцы тэрыторыі краіны адзначаліся замаразкі і ў паветры, і на паверхні глебы. Іх інтэнсіўнасць сягала ад 0 да мінус 5 градусаў. Замаразкі былі зафіксаваны метэаролагамі і ў пачатку чэрвеня.

Самым жа вялікім сюрпрызам мінулай вясны стаў снег. Ён назіраўся тры дні ў траўні - 1, 10 і 11 чысла. Прычым тут асобна спецыялістка падкрэсліла Оршу. У нашым горадзе снежная "коўдра" дасягала 6 сантыметраў. Вось такую халодную вясну і снежны травень мы перажылі.