Маладая настаўніца нямецкай мовы Таццяна Гелясіна выкладае ў роднай Барані ўжо чацвёрты год. З роднай гімназіі сыходзіць не збіраецца, як і з’язджаць з горада. На ўрок у 6-м класе прыйшоў карэспандэнт “Знамя юности” і на ўласным досведзе ўбачыў, што вучні асвойваюць нямецкую мову дзякуючы гульням, робяць паміж сабой інтэрв’ю, гуляюць у “Кракадзіла”, у “Снежны ком”. Сама Таццяна вучылася таксама ў гэтай гімназіі. Яна не з дынастыі настаўнікаў, бацькі працуюць на “Тэхніцы сувязі”, а муж Максім у прыватнай фірме.

З прыціркай да першага працоўнага месца праблем не ўзнікла, бо ў хаце і сцены дапамагаюць. Тым больш шэфства над сваёй нядаўняй выпускніцай ўзялі педагогі Яніна Кулінкіна і Алена Уварава. Першыя прафесійныя вынікі Таццяны не прымусілі чакаць. У скарбонцы дасягненняў яе вучняў, а значыць, і педагога — некалькі дыпломаў усіх ступеняў на раённай алімпіядзе па замежнай мове, конкурсе даследчых работ. Каб хлопчыкі і дзяўчынкі палюбілі нямецкую і англійскую, Таццяна Гелясіна робіць стаўку на гульнявыя элементы. Нядаўна разам са сваімі выхаванцамі маладая педагог паўдзельнічала ў міжнародным праекце ад Інстытута імя Гётэ “Школа за экалогію: думаць, даследаваць, дзейнічаць”. Школьнікі ў прамым сэнсе выйшлі ў народ — на вуліцах задалі сваім землякам пытанні аб экалагічнай сітуацыі ў горадзе, зборы другаснай сыравіны, энергазберажэнні У аўтараў лепшых праектаў ёсць шанец абараніць іх на моладзевай экалагічнай канферэнцыі ў Берліне. Таццяна высока ацэньвае намаганні вучняў і, вядома, марыць, каб іх заўважылі. У мінулым годзе сама яна ад Інстытута імя Гётэ пабывала ў нямецкім Саарбрюккене на курсах павышэння кваліфікацыі.