Месца для сустрэчы - памяшканне службы занятасці на вуліцы Замкавай - было абрана не выпадкова. Чарговы этап дыялогу зноў быў прысвечаны пытанням безпрацоўя. На гэты раз з ініцыятыўнай групай сустракалася намесніца начальніка ўпраўлення па працы, занятасці і сацыяльнай абароне Наталля Драздова. Дыялог быў пабудаваны на шэрагу пытанняў: інфармацыйная работа цэнтра занятасці, лёс выпускнікоў аршанскіх сярэдне-спецыяльных навучальных установаў і перспектывы праблемы працаўладкавання ў рэгіёне.

Наталля Драздова распавядала пра сёняшнія паказчыкі - некаторыя лічбы, якія адлюстроўваюць якасць работы цэнтра занятасці - па праблеме ў рэгіёне. І варта адзначыць, што тыя паказчыкі, якія даведзены аршанскай службе па сістэме вертыкалі, сапраўды, выконваюцца і перавыконваюцца. У сувязі з гэтымі лічбамі і ствараецца ўражанне, што праблема безпрацоўя ў раёне тычыцца не больш чым 0,8% працаздольных людзей (гэта сёння афіцыйная колькасць безпрацоўных).

Але насамрэч, праблема тычыцца далёка не толькі тых людзей, якія сталі на "біржу працы", але значна большай колькасці аршанцаў. Менавіта адсюль і ўзнікае праблема - лічбы прыгожыя, а рэальнасць ад іх моцна адрозніваецца.

Са свайго боку, дэмакраты выказалі шэраг прапановаў як палепшыць працу цэнтра занятасці. Гэтыя прапановы будуць перададзены адказным асобам і толькі тады будзе зразумела ці будуць яны рэалізоўвацца.