У ток-шоў якое арганізавала грамадская кампанія "Будзьма" прынялі ўдзел тры эксперты: Раман Воранаў - гісторык і культурніцкі мэнэджэр з Віцебску, Наталля Халанская - дырэктар клуба "13:87" і сацыяльны прадпрымальнік з Бабруйска, а таксама рэдактар нашага сайта Ігар Казмерчак. Вёў ток-шоў Уладзімір Булаўскі - культурніцкі мэнэджар, арганізатар канцэртаў і прадусар з Віцебску.

Госці з Віцебску і Бабруйску расказвалі пра паспяховыя прыклады работы гарадскіх ініцыятываў пра пераўтварэнні гарадской прасторы. Праўда, у кожным такім расказе былі свае нюансы. Напрыклад, Наталля Халанская распавяла пра тое як яна з сябрамі стварала свой клуб і пры гэтым - у адказах на пытанні гледачоў - адзначыла, што ў дзяржавы яна б памяшканне для клуба не брала б, бо мясцовыя ўлады хутка закрылі б такі праэкт. Пра праблемы дачынення грамадзянскай супольнасці з мясцовымі ўладамі гаварыў і Ігар Казмерчак. Ён жа распавёў і пра варыянты гарадскога пазіцыянавання для Оршы. У шэрагу таго з чым Орша магла б асацыявацца для саміх аршанцаў і для іншагародніх наведвальнікаў: Бітва пад Оршай, Караткевіч, рэлігійныя ўстановы (асабліва іх гісторыя і асобы, якія служылі тут), асветніцтва (таксама з гісторыі). Усе гэтыя варыянты маюць свае плюсы і мінусы, але галоўны мінус, што гэтыя асацыяцыі пакуль не працуюць. Самы распаўсюджаны стэрэатып пра Оршу: "Орша-дзве турмы аніводнага тэатру". У канцы Ігар Казмерчак падвёў вынік разважанням пра гарадскі брэнд - самы выгодны з іх мог бы быць "Орша-ільняная сталіца Еўропы", ці, як мінімум, Беларусі. Але, як і ў любы іншы пі-яр, раскрутка такога брэнду патрабуе ўкладання сродкаў, а галоўнае, матывацыі, якой у сістэме вертыкалі не хапае.

Поўнае відэа ток-шоў глядзіце на нашым сайце ў бліжэйшыя дні.