Прэс-цэнтар чыгункі падцвердзіў факт аварыі грузавога цягніка які рухаўся з Оршы на Мінск. Паводле афіцыйнага паведамлення, аварыя адбылася на перагоне Крупкі-Прыяміна 15 ліпеня а 16-08. З 89 вагонаў сыйшло з рэек 7 пустых. Хаця вагоны і былі пустымі ў іх моцна пашкоджаны колавыя пары, таксама пры аварыі пашкодзіўся і пуць.
Для пасажыраў гэта азначае асаблівыя нязручнасці, бо пакуль будуць ліквідаваныя наступствы аварыі ўсе цягнікі на гэтым даволі загружаным участку будуць хадзіць толькі па адным пуці. Ужо ў дзень аварыі двум пасажырскім цягнікам давялося змяніць свой маршрут. Так, цягнік Мінск-Віцебск, які выходзіць з Мінску а 17-04 пайшоў на канечную праз Маладзечна і Полацк, А Баранавічы-Крычаў да Віцебска дабіраўся праз Асіповічы і Магілёў. Сёння ў раскладзе руху цягнікоў, апублікаваным на сайце чыгункі мы прынцыповых зменаў не заўважылі, але прэс-служба папярэджвае, што калі вы сабраліся ехаць у Мінск, то лепш удакладніць наяўнасць цягніка па тэлефоне 105.
